Ձեր վստահելի աղբյուրը

Հայաստանյան քաղաքացիական հասարակության ներկայացուցիչները մտահոգված են ՄԱԿ-ի Զարգացման ծրագրի Եվրոպական տարածաշրջանային գրասենյակը Բրատիսլավայից Թուրքիա (Ստամբուլ) նախատեսվող տեղափոխման կապակցությամբ:

Ասուլիսում իրենց դժգոհությունը, մտահոգությունը բարձրաձայնեց «Հանուն կայուն մարդկային զարգացման» ասոցիացիայի նախագահ Կարինե Դանիելյանը: Նա նշեց, որ ՄԱԿ-ի հետ համագործակցող 15 հայաստանյան կազմակերպություն նամակ են հղել ՄԱԿ-ի գլխավոր քարտուղար Բան Կի Մունին, ՄԱԿ-ի զարգացման ծրագրի ադմինիստրատոր Էլեն Կլառկին, Հայաստանում ՄԱԿ-ի զարգացման ծրագրի Ռեզիդենտ-ներկայացուցիչ Պատրիս Կոեր-Բիզոյին:

ՀԿ-ները անտրամաբանական ու ոչ նպատակահարմար են համարում այդ գրասենյակի տեղափոխությունը մի երկիրը, որը իրագործել է Հայոց ցեղասպանությունը, 20 տարի շարունակ Հայաստանը պահում է շրջափակման մեջ, տարածաշրջանային որոշ պետությունների հետ չունի դիվանագիտական հարաբերություններ: Ըստ մտահոգ ՀԿ-ների ներկայացուցիչների, այս փաստը զգալիորեն կխոչընդոտի Հայաստանի պատվիրակությունների, այդ թվում ՀԿ-ների մասնակցությանը ՄԱԶԾ գործունեության ասպարեզում:

«Ինչպե՞ս կարելի է գրասենյակը տեղափոխել մի երկիր, որտեղ սահմանափակված է խոսքի ազատությունը, ազգային փոքրամասնությունների նկատմամբ անհանդուրժողական վերաբերմունք է դրսևորվում: Բացի այդ, եթե ԵՄ-ին չի անդամակցել, ինչպե՞ս կարող է դառնալ ՄԱԿ-ի քաղաք»,- վրդովված նման հարցադրումներ արեց Կ. Դանիելյանը: Այս մասին նշված է նաև նամակում:

Գրասենյակի տեղափոխությունից դժգոհ են նաև Սլովակիան, Կիպրոսը:

Ասուլիսին ներկա հասարակական գործիչ Սիլվա Ադամյանը և Էկո ակումբ Տապանի նախագահ Հրանտ Սարգսյանը նշեցին, որ իրենք չեն սահմանափակելու միայն այս նամակով, դիմելու են սփյոռքին, այլ ՀԿ-ների, աշխատանք ունի կատարելու նաև Հայաստանի ԱԳՆ-ն: «Պետք է ամեն ինչ անել, որ գրասենյակը չտեղափոխվի Թուրքիայի նման երկիր»,- ընդգծեց Ս. Ադամյանը: Նրանք կարծում են, որ Թուրքիան նման քայլով փորձում է ցույց տալ, որ ծայրահեղ իսլամիստական երկիր չէ, այլ ՄԱԿ-ի, Արևմուտքի գաղափարները կարող է տարածել Արևելքում: «Սակայն իրականում Թուրքիան դա կծառայեցնի միայն իր շահերին»,- համոզված է Կ. Դանիելյանը: Նա նաև կարծում է, որ այդ դեպքում ավելի կդժվարանա 1915 թվականի Հայոց ցեղասպանության համաշխարհայնացումը:

«Մենք նաև գիտակցում ենք, որ Թուրքիայի կողմից իրականացվող ֆինանսական աջակցությունը ՄԱԶԾ-ին ունի կարևոր նշանակություն, բայց ՄԱԿ-ը միշտ գերադասել է արդարադատության, մարդու իրավունքների և արդարության գաղափարները մնացած առաջնայնություններից, ներառյալ` ֆինանսականը»,- նշված է ՀԿ-ների նամակում: Նանք հույս ունեն, որ ՄԱԿ-ը հարազատ կմնա իր սկզբունքներին և հաշվի կառնի ռիսկերն ու խոչընդոտները ՄԱԶԾ-ի Եվրոպական տարածաշրջանային կենտրոնը Թուրքիա տեղափոխելու դեպքում: